पुलिस क्लबले जित्यो प्रो क्लब च्याम्पियनसिप क्रिकेटको उपाधि

समाज

गृहपृष्ठ
समाज
पुलिस क्लबले जित्यो प्रो क्लब च्याम्पियनसिप क्रिकेटको उपाधि

पुलिस क्लबले जित्यो प्रो क्लब च्याम्पियनसिप क्रिकेटको उपाधि

आइतबार, पुस १५, २०८०kalamnews

काठमाडौँ। क्रिकेटर करण केसीको विष्फोटक ब्याटिङक र सागर ढकालको उकृष्ट बलिङ प्रदर्शनमा नेपाल पुलिस क्लबले प्रो क्लब च्याम्पियनसिप क्रिकेटको उपाधि जितेको छ।

शनिबार पर्सास्थित नारायणी क्रिकेट मैदानमा भएको फाइनलमा घरेलु टोली पर्सा-११ लाई १०० रनको फराकिलो अन्तरले पराजित गर्दै पुलिस क्लब च्याम्पियन बनेको हो।

पुलिस क्लबले दिएको १४६ रनको लक्ष्य पछ्याएको पर्सा-११ पुलिसको बलर सामु टिक्न नसक्दा ११ ओभरमा ४५ रनमै अलआउट भयो। पर्सा ११ का लागि ओपनर अनिल शाहले सर्वाधिक १३ रन बनाउनु बाहेक अन्यले दोहोरो अंकमा रन जोड्न सक्नु भएको थिएन।

पर्सालाई अलआउट गर्न पुलिसका सागर ढकालले ४ ओभरमा २२ रन खर्चेर ४ विकेट लिन सफल हुनुभयो। त्यस्तै ललित राजवंशीले २ ओभरमा ५ रन तथा रासिद खानले १ ओभरमा ४ रन दिएर समान २ विकेट लिनुभयो। करण केसीले र शेर मल्लले समान एक/एक विकेट लिनुभयो। करणले तीन ओभरमा ७ रन मात्र खर्चिनु भएको थियो।

त्यसअघि टस जितेर पहिले ब्याटिङ गरेको पुलिसले करणको आक्रामक ब्याटिङमा ८ विकेट गुमाएर १४५ रन बनाएको थियो। करणले १७ बल खेल्दै पाँच छक्का प्रहार गरी अविजित ४० रन बनाउनु भयो। अर्जुन साउदले २६, शंकर रानाले १९, दिलिप नाथले १७ तथा कप्तान आरिफ शेखले १६ रन जोड्नु भयो।

पर्सा ११ का सइफुल्लाह अन्सारी र पवन सर्राफले समान २ विकेट लिनु भएको थियो। जोरा इन्टरनेसनलको आयोजनामा भएको दश दिने प्रतियोगितामा नेपालका चार र भारतका दुई गरी कुल ६ टोलीले प्रतिस्पर्धा गरेका थिए।

प्रकाशित मिति: आइतबार, पुस १५, २०८० ११:०८

प्रतिक्रिया दिनुहोस्