रमा आले मगर मन्त्रीमा नियुक्त

प्रमुख समाचार

गृहपृष्ठ
प्रमुख समाचार
रमा आले मगर मन्त्रीमा नियुक्त

रमा आले मगर मन्त्रीमा नियुक्त

मंगलबार, चैत २०, २०८० kalamnews

हेटौंडा। बागमती प्रदेशमा नेकपा (एकीकृत समाजवादी) बाट विना विभागीय मन्त्रीमा नियुक्त रमा आलेमगरले पद तथा गोपनीयताको शपथ लिनु भएको छ।

मंगलबार बिहान प्रदेश प्रमुख यादवचन्द्र शर्माले मंगलबार बिहान उहाँलाई विना विभागीय मन्त्रीको शपथ गराउनु भएको हो।

मुख्यमन्त्री शालिकराम जम्कट्टेलले मगरलाई सोमबार मन्त्री नियुक्त गर्नु भएको थियो। मन्त्रालयको जिम्मेवारी सात दिनभित्र टुंग्याउने प्रतिबद्धता मुख्यमन्त्रीले जनाउनु भएको मन्त्री मगरले बताउनु भयो।

मगर एकीकृत समाजवादीबाट प्रत्यक्ष निर्वाचन जित्ने एक्ली महिला सांसद हुनुहुन्छ। चन्द्रागिरी नगरपालिकाकी रमा काठमाडौँ क्षेत्र नम्बर १० (२) बाट प्रत्यक्ष निर्वाचित हुनु भएको थियो। मगर प्रदेशसभाको पहिलो कार्यकालमा पनि सांसद हुनुहुन्थ्यो।

उहाँले एक वर्षअघि चैतमै भएको सरकार विस्तारको क्रममा शपथको निम्तो पाएर पनि खाली हात काठमाडौँ फर्कनु परेको थियो। कृषि तथा पशुपन्छी विकास मन्त्रालय दिने भनेर काठमाडौँबाट बोलाइए पनि अन्तिममा निर्णय परिवर्तन भएको भन्दै उहाँलाई फर्काइएको थियो।

बागमतीमा नेकपा (एकीकृत समाजवादी) बाट श्रम, रोजगार तथा यातायातमन्त्री लक्ष्मण लम्साल र कृषि तथा पशुपन्छी विकासमन्त्री डा. राजेन्द्रमान श्रेष्ठ हुनुहुनछ। उहाँहरू गत चैतमा गठित नेपाली कांग्रेससहितको सरकारमा मन्त्री नियुक्त हुनु भएको थियो। बागमतीमा अझै चार वटा मन्त्रालयमा मन्त्री नियुक्त हुन बाँकी छ।

प्रकाशित मिति: मंगलबार, चैत २०, २०८० २०:४४

प्रतिक्रिया दिनुहोस्