काठमाडौँ। तीन दिने भारत भ्रमणमा रहेका कृषि तथा पशुपन्छी बिकास मन्त्री डा.बेदुराम भुसालले त्यहाँका समकक्षीसंग भेटघाट गगर्नु भएको छ।
नेपालका कृषि तथा पशुपन्छी बिकास मन्त्री भुसालले भारतका कृषि एवम् कल्याण मन्त्री नरेन्द्र सिंह तोमर र मत्यपालन, पशुपालन एवम् डेरी मन्त्री परशोत्तम रुपालासंग बुधबार भेटघाट गर्नु भएको हो।
दुबै मन्त्रीसँग भएको छुट्टाछुट्टै भेटमा कृषि उपज निर्यात देखि लम्पी स्किन नियन्त्रण र उन्नत जातका पशु निर्यातलगायत बिषयमा महत्त्वपूर्ण निर्णय भएको मन्त्रीका प्रेस संयोजक दिपक अनुरागीले बताउनु भएको छ।
भारतका कृषि मन्त्री तोमरसँगको भेटमा मन्त्री भुसालले नेपाली किसानहरुले उत्पादन गर्ने टमाटर निर्यात गर्न आग्रह गर्नुभएको छ। नेपालमा किसानले उत्पादन गरेको टमाटरले मूल्य नपाएको र भारतमा टमाटरको मूल्य आकाशिएको भन्दै नेपालबाट टमाटर निर्यातको प्रबन्ध मिलाइदिन मन्त्री भुसालले आग्रह गर्नु भएको हो।
जवाफमा भारतीय कृषि मन्त्री तोमरले अबको एक हप्ता भित्र नेपालबाट टमाटर आयातको कानुनी प्रक्रिया पूरा गर्ने प्रतिबद्धता जनाएउनु भएको छ। त्यस्तै मन्त्री भुसालले आफ्नो देशमा उत्पादन भएका किवी, ड्रायगन, एभोगाडो लगायतका फलफूल निर्यात गर्न नेपाल आतुर रहेको बताउनु भयो।
भारतीय मन्त्रीले भारतसँग जोडिएका नेपालका जिल्लामा लम्पी स्किनको निःशुल्क भ्यासिनेसन गर्ने प्रतिबद्धता जनाए। भारतीय पशुपालन मन्त्री रुपालाले नेपालमा पश्मिना प्रबर्द्धनका लागि भारतको लद्दाकका हाइबृड च्याङ्रग्रा उपलब्ध गराउने बताउनु भएको छ।
गाईको नश्ल सुधारका लागि साइवा गाईको साढे उपलब्ध गराउने प्रतिबद्धता जनाएको मन्त्रीका प्रेस संयोजक अनुरागीको भनाई छ। भारत भ्रमणमा मन्त्री भुसालसङ्गै मन्त्रालयका सचिव डा.दिपक खराल, मन्त्रीका प्रमुख स्वकीय सचिव सुशील भट्टराई रहनु भएको छ।
